終於、終於，FIFA最佳教練都要放棄喇！李斯特城宣佈炒領隊雲尼亞里。再唔炒，就唔洗再炒啦，因為英超已經完成咗三分之二嘅賽程，而身為上季神奇球隊李斯特城由天堂跌落地獄，飽受降班威脅，打破上屆車路士創出嘅多項最差衛冕冠軍成績，暫時同榜尾嘅新特蘭只係相差兩分，炒領隊係顯示管理層防止降班收場嘅決心。李斯特城今季究竟出咗咩問題？
第一，你知我知單眼佬都知，就係中場核心干堤離隊。李斯特城上季嘅成功，除咗華迪、馬列斯等攻擊主力嘅出色表現外，干堤嘅中場掃蕩功不可沒，佢嘅在陣幫助後防線減去唔少壓力，今屆佢一走，代替佢嘅文迪、艾馬迪或者尼迪迪都取代唔到佢。而得到佢嘅車路士就高居榜首，就知干堤幾咁重要。放走干堤當然係錯！不過，要體諒李斯特城始終唔係班霸，中小型始終面對成績好就會俾人拆骨嘅風險。賣走干堤，換得幾千萬鎊嘅收入，再分散投資，加強板凳深度，做法其實好正路。要怪只好怪，球探眼光唔好，買唔返相同質素嘅代替球員而已。
第二，陣式嘅轉變。李斯特城上季奪冠而回，今季最需要調整嘅係球隊踢法。筆者上屆已經分析過佢地踢法勝在簡單直接，中後場有波多數大腳清，再由前場開始緊迫對手，令到對手犯錯。呢種踢法嘅效率係建基於對手視李斯特城為弱隊嘅前提之上，對手谷上前場，咁先易偷雞得手。今屆李斯特城擁有冠軍光環，加上踢法已經俾人洞悉，弱旅縮後踢、打反擊，李斯特城就無從入手。雲尼亞里其實已經預見到問題嘅出現，識得簽入頂上工夫一流嘅施利文尼幫手破密集。只係落場同打機唔同，其他位置嘅球員需要練習配合，牽一髮而動全身，當由快攻變成高空攻勢，中後場嘅踢法應該點調整？呢樣係李斯特城今屆嘅敗筆。與此同時，簽入梅沙同施利文尼之後，岡崎慎司出場時間明顯少咗，缺少呢位拼命三郎，對手後防踢得輕鬆咗，李斯特城中後場嘅問題自然更加突出。
第三，賽程。今屆要踢歐洲賽，李斯特城賽程密咗，對領隊嘅考驗自然大咗。點樣輪換球員？點樣釐定比賽優先次序？踢法點調整？每樣都需要有詳細計劃。當比賽一多，球員體能、士氣自然難長期維持喺高水平，君不見利物浦、阿仙奴、熱刺都曾經面對低潮期。好彩嘅係，李斯特城得返聯賽同歐聯要踢，其他盃賽都畢晒業，呢樣問題應該可以好快解決。
李斯特城最後能唔能夠逃出生天？咁就要睇新領隊人選，同埋能唔能夠以最快時間帶返起隊波，踢出上屆嘅士氣，等球隊再創一次奇蹟喇！
