上星期英超最令人振奮嘅比賽當然係利物浦 2:0 擊敗熱刺，終於打破 2017 年嘅差劣走勢，贏返一場，相信有助提升一下士氣。尤其係踢完非洲國家盃歸隊嘅文尼對球隊幫助唔少，起碼佢嘅變速同個人突破可以撕破密集、幫球隊打破悶局。單計對熱刺嘅上半場，已經有四次嘅入波機會，如果佢把握力好啲，踢完上半場已經可以完場。有好多人話利物浦返生喇！事實上又係唔係咁易呢？
其實睇返成場波，熱刺之敗，雖然對手文尼、拉蘭拿表現出色，但唔多唔少關自己佈陣出錯事。熱刺一心諗住自己班波後生有活力，想好似壓迫車路士、曼城咁瓦解對手，即使作客晏菲路都無有怕，無打算縮後防線守死利物浦。只不過咁就出事，熱刺唔記得英超除咗自己識快速壓迫，利物浦都識，結果防線推得太上，俾利物浦前線好多空間發揮。利物浦今場踢法同上屆李斯特城嘅踢法同出一轍，後防穩守，然後盡量放長波俾前線哨，再透過兩三個攻擊球員完成射門，文尼就好似上一季嘅馬列斯咁，扮演進攻嘅核心。再加上，熱刺左閘丹尼路斯受傷，被迫使用非常規正選嘅賓戴維斯，企位失當，俾文尼恰死、一爆再爆，如果唔係羅里斯有水準演出，熱刺隨時輸得仲慘。
不過咁，利物浦出名係英超羅賓漢，對強隊遇強愈強，對弱隊遇弱愈弱，贏到熱刺唔多出奇，問題係趁盃賽出局嘅空檔，高普必須搵到對弱旅破密集嘅方法。其實，喺足球場上，破密集主要有兩種方法，一係遠射，一係高波。遠射方面，利物浦有古天奴，只係傷癒後狀態未十足，同埋守衛知道佢遠射了得都盡量減少佢起腳機會。高波方面，前線文尼、費明奴、古天奴都係靈活型球員，之後要數已經係輪換正選嘅韋拿杜姆。只係韋拿杜姆係攻中，唔係前鋒，好多時企位上唔係第一點，如果要充分發揮佢嘅頭槌威力，或者就要將佢推前，費明奴或古天奴稍稍移後，先可以保持陣式嘅完整。筆者始終覺得利物浦今季嘅最大敗筆係，放走球隊嘅空中霸王賓迪基，對弱隊少咗一瓣有效率嘅高空攻勢，而又無適當嘅替補。當然啦，用賣出賓迪基嘅錢買入文尼，都算係球隊今季最佳收購。
利物浦今季所有盃賽出哂局，聯賽又已經俾車路士拋開一個馬位，今季只能夠專心爭前四嘅歐聯位置。如果發揮穩定，來屆有機會參加歐聯，麻煩班主約翰亨利揼本簽返個柱躉式前鋒，咁先唔駛再做羅賓漢！
