上周英超最矚目係華迪今季首次連中三元，協助李斯特城 4:2 殺退曼城，如果唔係比賽末段連入兩球，哥迪奧拿可能嚐到登陸英超後嘅最大敗仗。經過咗季初聯賽六連勝嘅強勁走勢，俾熱刺擊敗後，曼城走勢開始反反覆覆，近期更加陷入小低潮，好彩周中 2:0 贏咗屈福特，暫時回一回氣，但嚟緊兩個星期，先後要對阿仙奴、利物浦兩隊直接競爭對手，萬一有咩閃失，可能俾落後三分嘅熱刺趕過。究竟曼城今季有咩問題呢？
首先，當然新兵磨合問題啦！到目前為止，今季簽入嘅新球員得根度簡表現出身價、洛尼圖合格，其他嘅巴禾、史東斯、辛尼表現都唔對辦，甚至俾人感覺新不如舊，令球隊不進則退。曼城要拎到好成績，呢班貴價新兵就要盡快適應英超節奏、哥迪奧拿嘅戰術！
其次，效率。筆者始終覺得哥迪奧拿嘅 Tiki-taka 戰術係一套缺乏效率嘅戰術。效率嘅意思，係指用最少嘅付出換最大嘅收穫。Tiki-taka 要由控球能力最頂級嘅球員發揮，咁先係無敵。如果球員質素差少少，好似今季史東斯上腳過多、成日俾人偷甩，咁就一次意外足以致命，哥迪奧拿他日如果執教中小型班，呢個問題就會表露無遺。而且 Tiki-taka 控球時間多，但與進攻效率唔係成正比。睇返曼城今季聯賽嘅數據，總共入咗 34 球，16 場有 274 腳射門，即係每 8 腳射門先入 1 球。平均一場超過 17 次射門，但中龍只有 93 腳，即係三分一，更錄得全英超最多嘅 181 次唔中框次數。睇呢堆數據就知道，曼城浪射問題幾嚴重啦！點樣提升前場效率，將攻勢變為實際，哥迪奧拿真係要動下腦筋。
仲有嘅係，甘賓尼始終年紀漸大、傷患纏身，曼城目前缺少一個富經驗嘅精神領袖，帶領球隊應付逆境，落後之下容易方寸大亂。好似對李斯特城，頭 20 分鐘唔集中，連輸 3 球，想追？已經欲救無從。暫時最適當做法係，將老將耶耶托尼擺返落正選陣容，甚至將佢移落中堅位置，睇吓解唔解決到今季防線漏水嘅問題。不過，以曼城性格，一月大肆增兵嘅機會大啲。
最後，今季曼城嘅轉會操作唔理想，導致後備兵源不足。呢樣同第一點唔同，第一點可能係短期問題，但轉會操作涉及一整年嘅計劃。點解咁講？睇返轉會市場，將文加拉外借，加上甘賓尼受傷，球隊長期倚賴史東斯同奧達文迪兩個中堅，哥迪奧拿可能基於中堅兵源不足、或個人喜好，多次將高拉洛夫移入中路，好幾場成為失分罪人。正前鋒得阿古路能擔大旗，洛尼圖級數始終爭啲，伊恩拿祖就稍欠火候，要反敗為勝得板斧兩度，相反翼鋒球員過多，令到前線資源錯配。
曼城暫時成績唔算太差，歐聯晉級十六強，聯賽都暫列前四，但身為英超最豪嘅球會，加上聘請到名帥哥迪奧拿執教，咁嘅成績，球迷應該唔收貨。睇吓哥迪奧拿會唔會好似干地咁，試吓轉陣，等球隊愈踢愈順喇？
