上周英超最矚目嘅莫過於倫敦打吡，由挾六連勝氣勢嘅車路士主場對住今季聯賽唯一不敗之師嘅熱刺，結果熱刺破咗車路士嘅 601 分鐘不失球紀錄，車路士就破咗熱刺嘅聯賽不敗身。睇完呢場波，筆者覺得最大睇頭係熱刺領隊普捷天奴。普捷天奴係近幾季英超冒起得最快嘅領隊，由修咸頓到熱刺，好多球評家、球迷對佢嘅領軍能力都眾口稱譽，讚嘅多、批評嘅少。筆者對佢嘅能力都深表認同，只係認為呢場波顯示到佢嘅局限，如果佢能夠克服，就應該可以更上一層樓。
睇返場波，熱刺頭 20 分鐘擁有壓倒性嘅優勢，複製對曼城果場嘅贏波方式，採取高強度壓迫，打到車路士毫無還手之力，連波都好難控得定，呢種踢法亦係熱刺上季嘅成功之道。熱刺球員當打，活力充沛，但能放不能收，頭 20 分鐘谷得太盡，加上今季要踢歐洲賽，一周雙賽對體力始終有影響，到上半場中後段，速率明顯已經慢落嚟，到下半場落後更加想谷都谷唔起，最後三分全失。熱刺贏在起跑線，睇上半場或者頭 20 分鐘嘅表現，熱刺無疑佔優，但笑到最後嘅係車路士。
車路士上半場捱打，但柏度完半場前追平，見對手開始慢，下半場開波就調整策略，嘗試「以彼之道，還施彼身」，由前場開始壓迫返熱刺，而且好快就反超前，領先之後無幾耐，車路士就無繼續加強力度壓迫，而係開始縮返後場、穩守為上。一進一退之間，就見到成場波車路士嘅戰術其實不斷變，而熱刺嘅戰術變化明顯比較單調，車路士戰術、經驗佔優，贏其實好合理。
戰略上，普捷天奴呢場明顯計錯數，周中踢完歐聯，周末諗住用壓迫踢法贏一周一賽嘅車路士，體能根本無法維持 90 分鐘，最後只能贏到個頭、輸咗個尾。而且熱刺明顯缺乏雙線作戰嘅兵源，要場場咁高強度壓迫，起碼需要兩隊有質素又當打嘅球員，否則只能夠揀波踢。球員質素上，熱刺嘅經驗始終輸蝕，由上季對車路士果場踢波變踢人，到今季呢場盲目迫搶，可以見到熱刺球員心理質素、經驗始終爭啲，睇嚟需要多兩三季磨練先能夠真正奪冠。戰術上，普捷天奴無預備 Plan B，只識快速壓迫，落後下只能位換位，真正嘅戰術調整就未見，睇嚟要返去研究多一兩套打法先得喇！始終高強度壓迫踢法雖然無敵，但有效時間只有 20 分鐘，踢得再好贏唔到波都無用。呢個係熱刺近季嘅小低潮，睇下普捷天奴睇唔睇到隊波嘅問題而再作調整喇！
最後，借此一角，為遇上空難嘅查比高恩斯致哀，希望死者安息、死傷者家屬能盡快撫平傷痛。
