過去呢個禮拜，雖然無英超賽事，但唔少球迷都過得驚心動魄，因為奪得英超、NBA 等體育節目香港播映權嘅樂視突然傳出資金危機，被指欠債 500 億元，更拖欠 100 億元，有爆煲危機，需要裁員、停止擴張、以至撲水救亡，最後搵到富商投資 6 億美元，暫時解決燃眉之急。一旦樂視有咩冬瓜豆腐，球迷們都咪話唔驚，隨時提早收咧，下半季未必有得睇。
呢次危機，除咗係公司經營策略有問題之外，亦都一定程度反映電視播映權愈搶愈高，隨時澎漲過快，爆煲收場。睇返樂視的情況，有估計洗喺相關體育賽事轉播權嘅投資已超過 77 億元，其中超過 31 億元用作收購三季英超播映權，仲未計節目製作費用，都已經平均一季洗成 10 億元。羊毛出在羊身上，問題係單靠香港市場，公司可唔可以純粹靠英超回本？好，咁不如睇睇之前拎到英超播映權嘅 Now，截至今年 6 月 30 日，客戶總數大概 130 萬左右，ARPU 為 194 元，平均每月月費收入 2.5 億元左右，即係話一年基本月費收入 30 億元。就咁睇，一季 10 億元嘅播映權費，樂視都有機會維到皮，只不過 Now 喺香港經營咁多年，先儲到咁多客戶，新公司進入市場好難短時間內達到呢個數，而且佢唔止買咗英超播映權，其他播映權同埋節目製作都要錢，所以樂視經營先至有壓力，需要加快吸納客戶以至廣告，咁先繼續有得玩。
英超嘅播映權水漲船高，愈來愈貴就係人都知，但點樣維持適度增長先係學問。電視如是，球會如是。英超球會透過電視轉播分紅上升，先至愈來愈有錢買球星返黎，就好似 2014-15 球季收入最高嘅球會頭 20 位，共有 9 隊係英超球隊，連紐卡素、愛華頓、韋斯咸呢類中型班收入都多過唔少有份踢歐聯嘅球會，可以大手收購球星返黎效力。只不過，如果中小型球會擴張過度，突然收入大幅下滑，或者班主易手撤資，或者重磅收購貨不對辦，降班收場，經營不善隨時導致球隊沉淪多年，球迷熟悉嘅例子就有列斯聯、樸茨茅夫、富咸、伯明翰等等，最近 10 年類似情況好似愈來愈多。要經營多年屹立不倒，就只有穩打穩紮，睇清楚自己實力作出部署，唔好一步登天。只係，踏實已經唔再係經營嘅美德喇！
