- 圖片來源：路透社
如果人生有四季的話，莫耶斯的春天應該喺接手曼聯果一刻（唔係果一季）已經完咗。想當年，以低價買入物超所值嘅卡希爾、積基卡等骨幹、帶領中型班愛華頓衝擊前四位置，令莫耶斯深得同為蘇格蘭人嘅費格遜讚賞，欽點為曼聯領隊接班人，結果執教短短一季，就黯然下台，留低嘅只有九九八十一斬嘅傳奇、同埋「莫天才」嘅嘲笑聲！之後多數嘅批評者只係質疑佢唔識教大球會，加上費 sir 嘅身影太巨大，接手唔易，基本上，唔少球迷覺得佢教中型班繼續游刃有餘。只不過，之後果屆，佢季中遠赴西班牙接手皇家蘇斯達，幫球隊護級成功，教完整整一年後，又再次失業，直到今季初，艾拿戴斯升呢教國家隊，莫耶斯接掌佢留低嘅空缺。勢估唔到，等緊莫耶斯嘅係，只曾打和修咸頓、西布朗，取得僅僅兩分，「英超開季頭十場最差成績」呢個紀錄！
新特蘭嘅問題好簡單，六個字講完，「攻不銳，守不穩」。問題根源係球會嘅轉會政策完全失敗，睇返今個夏季轉會窗，就知發生咩事。球會引入咗總共 10 個球員，有 1 個前鋒、3 個中場、5 個後衛、1 個龍門，4 個係買入、3 個係借、2 個免費簽入，1 個就無公佈，照咁睇。球會唔係完全無錢、無資源引入好球員，亦唔係唔知球會需要買人先可以爭取護級，只係買親都錯、或者係唔啱用。
有睇近幾季新特蘭嘅球迷都知，新特蘭最大問題係攻力疲弱，前線波連尼傷多過踢、史提芬費查表現飄忽，最可靠係由美職回流嘅迪科爾，而且中場無合適嘅派牌、用波球員，只要後防一輸，就無咩板斧可以從後趕上，等於一失波就完場。今季放走史提芬費查，只喺轉會窗完結後免費引入安尼捷比，中場簽入派拿、租借贊奴沙，但前兩者高峰期已過、後者上季雪得太耐表現走樣，而且兩個中場都係擅長自己個人突破多過造波，改善唔到球會進攻節奏、系統，攻擊線繼續沉淪。
而後防問題嚴重，但改革又急、又無合適球員。買入兩個曼聯小將麥尼亞、路夫，好難期望無咩英超經驗嘅佢地能夠即時產生作用；喺車路士買入迪積保洛積算唔錯，始終當打同上季外借雲達不來梅都幫到球隊護級，只係上陣幾場又放返去後備席；加上放走開始走下坡但仲算當打嘅卡保奧（反而 35 歲嘅奧沙留隊踢正選）。咁嘅後防線，始終唔捱得幾耐。
球員質素有限，如果教練戰術得宜，都未必無救。莫耶斯俾人感覺開始亂了方寸，以前教愛華頓時，戰術多元，由費蘭尼、卡希爾嘅頭槌，到派拿、拜恩斯嘅疊瓦式進攻、罰球，阿迪達嘅派牌，加上積基卡、迪斯甸領導嘅後防，成為英超黑馬。之後執掌曼聯，只想靠費蘭尼嘅頂上工夫打破僵局，開始獨沽一味。黎到今季執掌新特蘭，前線只有迪科爾，高空波此路不通，唔知莫天才會唔會搵到自己嘅新一條路？定係今個周末之後，大 Sam 回巢，送佢上路呢？
