輸！輸！輸！輸！輸！講緊嘅唔係明朝嘅「七殺碑」，而係曼城近年喺歐聯對住巴塞隆拿嘅成績。除咗 2013/14、2014/15 球季外，今季曼城再對巴塞隆拿，結果倒戈嘅巴禾領紅，曼城被炒 4 球，再次敗走魯營。
賽後，好多人將輸波責任歸咎於巴禾，但係事實係咪咁？筆者又覺得未必喎！因為巴禾 53 分鐘領紅，固然因為自己派膠，走出禁區想解圍但係傳失，俾蘇亞雷斯笠空門，情急下用手擋波，結果領紅收場，但睇返場波，犯錯嘅又何止巴禾一個？曼城輸嘅第一球，對住巴塞隆拿 3-4 名攻擊球員，曼城基本上夠人防守有餘，只係大家集體夢遊，美斯第一次起腳被擋出，無人衝過去幫手解圍，結果美斯落後兩個身位都可以搶返個波，扭過龍門補射入網；第二球失波，純粹係迪布尼自己喺中場交失波，俾對手向前一傳已經係美斯，龍門都欲救無從；至於第三球，同第二犯嘅錯差不多，只係交完之後，對手話咁易就單刀，再橫傳俾空曬嘅美斯輕鬆完成帽子戲法；最後一球就純粹尼馬個人表演，攔截唔到都無話可說。曼城成隊波輪流犯錯，又何止巴禾？
除咗落場球員之外，你估輸波唔關哥迪奧拿事咩？筆者覺得哥迪奧拿俾人神化得太緊要，個個講到佢再世諸葛咁款。哥迪奧拿雖然出色，但又唔係無敵，始終球壇時刻在變，足球戰術潮流亦然，好似近十幾年黎講，由摩連奴開始嘅防守反擊、到哥迪奧拿嘅 Tiki-taka，再到而家嘅全場緊迫、無球跑動，每過幾年一變，無話邊套戰術可以打遍天下無敵手嘅。哥迪奧拿過份強調控球，巴禾今季都唔係第一次派膠啦，對熱刺輸波已經見到曼城始終唔係巴塞，應該搵一套結合到球員特性嘅戰術，同埋需要睇餸食飯，對住控球能力冠絕歐洲嘅巴塞，好心就唔好同人鬥控球啦！4:0 就係同人鬥控球嘅結果囉！
當然啦，今季最好嘅地方係，曼城小組賽已經對巴塞，即使次循環再輸，只要對實力較弱嘅慕遜加柏同些路迪贏到，已經可以安然出線十六強。呢隊曼城要再贏英超，始終有一定把握，因為兵源雄厚同對弱旅穩定性強，但如果哥迪奧拿想打破文仙尼、柏歷堅尼等前朝領隊嘅宿命，一償歐洲冠軍滋味嘅話，就唔該動下腦筋，唔好獨沽一味控球在腳，你唔悶，球迷都悶啦！
