啱啱踢完嘅英超榜首大戰，熱刺主場對曼城，結果熱刺 2:0 淨勝曼城，如果唔係林美拉嘅十二碼俾巴禾撲出，曼城隨時輸得仲甘！曼城六連勝終於斷纜，熱刺成為英超唯一不敗之師，追至落後曼城一分。睇返場波，熱刺基本上踢完上半場已經可以收工，球隊以快速壓迫，迫到曼城抖都無得抖，加上曼城中前場核心迪布尼受傷，組織工作由大衛施華一人擔大旗，結果俾人成功凍結，阿古路孤立無援，熱刺技術擊敗曼城。
哥迪奧拿嘅戰術理念人所共知，一切由控球開始，而普捷天奴正正利用曼城控球戰術嘅特點，作出針對性部署。熱刺由前場開始緊迫，令曼城唔可以從容咁組織攻勢，以速度打亂控球，而且曼城班底雖然唔弱，但同哥迪奧拿教慣教熟、訓練經年嘅巴塞隆拿、拜仁慕尼黑始終有一段距離，所以熱刺迫搶奏效，成功打破曼城不敗金身。由幾項數據可以睇到熱刺迫搶嘅威力，好似曼城今場共有 482 次傳送、377 次成功，比熱刺嘅 342 次、243 次成功多，控球率係 58% 對 42%，但佔優嘅其實係熱刺，曼城今場總共有 115 次係屬於回傳，曼城最多出現嘅傳球組合係史東斯傳俾巴禾（14 次）、高拉洛夫傳俾史東斯（13 次）、巴禾傳俾奧達文迪（13 次），即係話曼城有唔少係後場無意義嘅傳球，對熱刺根本構成唔到任何威脅，而且好多時因為曼城後防唔願意輕易解圍，而俾熱刺球員迫到險象環生。
曼城雖然都有作出針對性部署，最明顯係後防線嘅佈置，由龍門開始做組織，當皮球運上前場，防線就隨之推上，既增加中場嘅傳送選擇，亦都方便佈置越位陷阱，中斷對方攻勢。只不過熱刺迫搶太成功，把握到曼城兩次控傳嘅失誤，而且熱刺控球無曼城咁執著，後防受壓會寧願大腳踢前，避免犯不必要嘅錯，史端寧同拿華斯空有速度，踢法單調，對住熱刺嚴密防守，佔唔到任何甜頭，只能無功而還。
經過咗上季嘅臨尾脫腳，今季熱刺引入咗雲耶馬、施素高，中場硬淨程度同效率都有所提升，板凳深度足夠應付雙線作賽，只要前線嘅贊臣融入到球隊，填補到哈利簡尼受傷嘅空缺，球隊應該運作得更加暢順。熱刺只要汲收經驗，增強球隊穩定性，搵到方法破弱隊嘅密集，就有力挑戰冠軍寶座。而輸波嘅曼城又唔駛太緊張，始終成個英超踢得到呢種壓迫踢法嘅可能得熱刺同利物浦，而且只要經過國際賽期後，迪布尼能夠復出，中前場嘅組織能力應該有所改善，加上球隊嘅穩定性較高，曼城可能又會踏上連勝軌道。
