早兩個星期，筆者講曼市打吡，話曼聯條脊骨好過曼城，跟住曼聯就即刻陷入三連敗嘅小低潮；而另一隊季初開得唔錯嘅車路士亦新敗於利物浦腳下，而家英超得返曼城一隊全勝之師！睇完曼聯同車路士嘅敗仗，筆者最大感觸係抱殘守缺只係等死，足球場上要勇於求變先有希望！
講返曼聯先，輸俾同級對手曼城唔算好大問題，輪換之下作客輸俾飛燕諾都算係咁，最後輸俾屈福特就稍稍令人意外。對屈福特賽後，朗尼表現成為其中一個焦點，甚至有球迷將佢嘅失誤剪輯出黎供大家恥笑，朗尼表現點？應該唔駛筆者再多講。筆者反而覺得最大問題應該係主帥摩連奴，感覺昔日嘅少帥已經開始失去求變嘅動力。由前季執教車路士開始，摩連奴開始懶得思考，只係識將球員硬塞入去自己嘅 4231 陣式裡面，無認真思考過球員特性、分工、對手部署等等，只係識套上一個陣去踢，靠球員自己發揮決定勝負。事實上，筆者覺得 4231 唔再適合曼聯，因為中場中普巴、費蘭尼破壞有餘，但唔識連結起成隊波嘅進攻，朗尼更加係幫對手解圍，球隊有需要以靴里拉或卡域克鎮守中場，幫手派牌分波，而前線伊巴謙莫域年事已高，加上目標太大，需要隔離有人幫波、合作，先可以令進攻節奏加快。合理嘅陣式，應該係 4312，然後利用兩閘攻強守弱嘅特點，支援前線，無波時兩個防中墜後協防，先可以改善球隊攻守平衡。
而車路士對利物浦時，最大問題都係教練干地過於保守，只係一意龜縮，攻守失衡，落後兩球都無 plan B 谷上去，最後完敗俾高普。呢兩三季，車路士陣容都有結構性嘅問題，好似左閘位自艾殊利高爾後，一直未搵到適合嘅替補人選。艾斯比利古達右腳踢左閘，防守唔差，但疊瓦助攻係自斷一臂，每當去到危險地帶，就會出現因為左腳唔熟只能右腳回傳嘅情況，拖慢球隊節奏，甚至俾人反擊得手，而且防中馬迪雖然身位好、控球穩，但速度慢、助攻力弱、單蹄馬問題嚴重，今季防中有大勇嘅干堤加盟，情況已經有改善，但干地鍾意雙防中，配搭工兵型嘅奧斯卡，就令到球隊進攻成日唔夠人。最合理嘅調動，除咗艾斯比利古達重返右路之外，應該係將法比加斯擺返入正選陣容，或者改踢 442，以巴舒亞伊配哥斯達，增強鋒線能力，咁樣先有機會反敗為勝。
最大問題係，人有惰性，之前果套成功過，就以為一直會成功落去，4231 已經唔係最適合曼聯、車路士嘅踢法，兩隊教頭唔知識唔識變？肯唔肯變呢？呢樣隨時係今季成敗嘅關鍵。睇返競爭對手曼城，哥迪奧拿雖然有時為變而變，教拜仁就將拿姆轉型，今季就試將兩閘移中，效果如何雖然係未知之數，但起碼肯嘗試，唔會見以前踢開 4231 就繼續沿用就算。勇於求變，先有希望，足球如是，香港如是！
