美洲國家盃完咗，歐洲國家盃完咗，新球季又未開鑼，球迷們嘅焦點通通去曬夏季轉會市場之上，呢段係英超豪門大手掃貨嘅日子，係唔少球迷最期待又最無奈嘅日子。最多人關注嘅係，普巴以破世界紀錄轉會費返去母會曼聯，呢段消息愈傳愈似真，到截稿時仲未有定案，如果成真，祖雲達斯應該掩住半邊嘴偷笑！
睇返普巴喺歐洲國家盃嘅表現，佢雖然身高腳長、保護皮球能力強、後上射門不俗，但遠遠未達到球王級水平，而且受位置所限，佢唔係美斯、C 朗拿度呢類入球機器，甚至唔係一個正宗 10 號仔，究竟喺關鍵時候能唔能夠踢出身價波，幫球隊起死回生呢？呢個係一個極大嘅問號。就咁睇，曼聯、摩連奴應該會成為轉會市場嘅水魚。
要唔做轉會市場嘅水魚，有幾個關鍵。第一，唔好非理性消費，唔好喺最後一秒趕住買人。最佳例子係，當年費蘭度托利斯天價由利物浦轉會車路士，利物浦為咗即時補充托利斯嘅空缺，以破球會紀錄嘅 3500 萬鎊引入當時得令嘅安德魯卡路爾，但又無研究球會打法係咪適合球員，最後利物浦將收到嘅巨額轉會費花在一個完全唔適合嘅球員身上，而卡路爾就愈踢愈沉，始終未回復當年水平。
第二，唔好追逐名牌。要唔做水魚，最簡單方法係唔好追逐名牌，如果好似摩連奴呢類教練咁，講求即食，下下大手引入名牌，今季引入嘅伊巴謙莫域、米希達恩，以至普巴，都係名牌貨，係中堅拜利名氣稍遜（但身價都不菲），咁樣做老襯機會自然大增。如果好似雲加咁，專攻幼齒，雖然有時貨不對辦，不過起碼身價唔高，有犯錯嘅空間，無買名牌球員而無表現咁礙眼，較少機會成為水魚。
第三，要有長遠眼光，搵定 plan B。無錯，喺球場上，每個球員嘅特性都唔同，無完全一樣嘅代替品，但起碼都可以搵到相似功能嘅球員。好似普巴咁，唔買普巴，可以試下維達爾、馬度迪、咸錫，功能同質素相差唔太遠，慳返嘅轉會費隨時夠買多一個返黎做 plan C添啊！最理想嘅，當然係一早引入或者培訓到第二梯隊接班，連轉會費都慳返。
第四，有第二梯隊接到班，你都要識用先得。最佳例子當然係車路士啦。車路士球探眼光唔差，成日網羅到啲潛質優厚嘅球員返黎，但年青球員無得落場證明自己。經常俾人恥笑嘅係放走盧卡古同奇雲迪布尼，表現大熟大勇，而睇返車路士上季外借球員名單有26人之多，呢班球員又好似未能上位，唔知又自行放走幾多個明日之星喇！
第五，唔好淨係聽經理人講咩，要理性分析自己球隊需要。就好似上季摩連奴執教車路士咁，借入同自己相同經理人文迪斯旗下嘅法卡奧，代替前季後備有貨交嘅拿美擔任第二前鋒，結果表現有目共睹。筆者雖然唔係摩連奴、文迪斯肚裡面條蟲，唔知實際情況係點，不過你話文迪斯唔係促成交易嘅主因，應該無人信！
第六，玩多啲 FM、FIFA，自行熟習買人技巧啦。
