首先，喺度恭喜葡萄牙奪得 2016 年歐洲國家盃先。我諗賽前無咩人估到葡萄牙能夠喺決賽擊敗東道主法國捧盃而回，連筆者支持葡萄牙嘅朋友都一早已經表示不寄厚望，點知世事往往係咁，勢估唔到開波無耐，C 朗拿度已經因為俾皮耶撞一撞因傷退下火線，唔少球迷甚至覺得場波應該放左入雪櫃。只不過，法國成場攻勢唔多到肉，係爭啲補時 Gignac 絕殺，葡萄牙幸好有門柱擋住，故事先至未完。捱到入加時，形勢開始逆轉，葡萄牙攻勢愈黎愈入肉，法國門前險象環生，最後憑住後備入替嘅艾達一箭定江山，為葡萄牙奪冠而回！睇返今屆表現，葡萄牙能夠奪冠主要有幾大因素。
1. 賽制
今屆賽事由 16 隊增加到 24 隊，小組賽出線機會大增，6 組裡面 4 組嘅最佳第 3 名都可以晉身淘汰賽階段。葡萄牙雖然小組賽連續 3 場和，都已經足以趕搭尾班車出線喇。如果今屆仲係 16 隊賽制，可能一早同大家喺電視機隔離睇緊波。
2. 都係賽制
以前踢 16 隊時，走線方法比較簡單，多數一睇就知首名踢上線，次名踢下線，反之亦然。今屆因為有最佳第 3 名嘅出現，突然間幾乎唔可能走線，唔到最尾都唔知自己對咩對手，所以突然間西班牙、意大利、德國、法國列強都聚集喺下線，未入決賽已經踢到五癆七傷，葡萄牙最後一分鐘碌入上線，際遇就比小組第二名嘅冰島幸運。
3. 迪甘斯
法國贏唔到，葡萄牙循例都要多謝下迪甘斯。成場法國其實踢得唔差，尤其係法定時間嘅 90 分鐘，法國都佔有唔少優勢，而換高文入場都係正確選擇。只不過，法國話曬都係主辦國，對方無左 C 朗拿度呢個主力，你仲唔趁佢病攞佢命？下半場法國態度唔急，好似即使贏唔到都無所謂咁，戰術保守，無諗點破密集，又唔早早換人，將爆到無曬力嘅施素高或者俾人嚴密看管嘅基沙文換走，最後只好怪自己唔爭氣喇！
4. 整體戰出色
今屆葡萄牙球員質素唔係頂班，比起 2004 年坐擁費高、迪高等主力嘅葡萄牙仲差一大截，佢地都自己知自己事，所以成隊都以團隊為先（除左 C 朗拿度），反而能夠爭取到好成績。除左葡萄牙，威爾斯、意大利、冰島都係憑住整體去贏波，令人留下深刻印象，而奪得神射手嘅基沙文亦都係踢整體戰極之出色。留意下一個球季，整體戰會唔會成為歐洲球隊嘅努力目標嘞。
5. 一日唔死，一日都有運行！
葡萄牙今屆最大特點係——唔死。葡萄牙人腳逐個秤，唔夠法國、德國，甚至係比利時黎，但老帥山度士嘅戰術要求就係唔輸，唔輸就有機會贏，即使俾人恥笑 5 連和入四強，對克羅地亞、法國都係以守為先，咁多場係得對威爾斯一場 90 分鐘內贏波，但葡萄牙又唔係偷唔係搶，最後拎埋冠軍，球迷們都無話可說。所以話呢，只要一日唔死，一日都有運行！
