今屆歐洲國家盃已經進入淘汰賽階段，最矚目當然係東道主法國、世界盃冠軍德國、上屆冠軍西班牙、上屆亞軍意大利、英格蘭，呢五隊曾經奪得世界盃嘅強隊喺下線殺個難分難解，邊隊出到線真係要踢過至知。好多人關心法國可唔可以借住主場之利殺出重圍，睇返頭三場分組賽，表現最出色無疑係皮耶，干堤同基沙文都幾搶鏡，應該可以奠定以後幾年嘅國家隊席位。但係，開波之前最多人期待嘅普巴表現不似預期，未能成為球隊重心，甚至有進退失據嘅情況出現，究竟普巴係咪過譽呢？
睇數據，普巴踢中場，踢左兩場半嘅比賽，傳球次數 127 次，位列 57 位，成功率 87%。比起其他球隊嘅中場核心表現差一大截，德國卻奧斯 353 次（成功率 93%）、格列沙加 307 次（成功率 92%）、恩尼斯達 284 次（成功率 93%），甚至比唔起自己隊友、出場時間少過佢嘅干堤 182 次（92%），只係比踢少佢半場波嘅馬度迪多 5 次。創造機會方面，普巴兩場半共創造 5 次機會，當然比唔上大勇嘅皮耶 14 次，只是僅勝基沙文、高文同馬度迪（4 次）。而普巴表現最出眾嘅並唔係進攻，而係防守，反搶次數達 20 次，冠絕全隊。睇返數據，就知道普巴表現一般，仲未擔到法國隊枝大旗，遠遠未達到施丹嘅級數。
普巴表現一般，主要原因係教練迪甘斯唔識用佢。睇返陣容，法國中場正選陣容，三場分組賽都係唔同組合，第一場係普巴、干堤、馬度迪，第二場係皮耶代替普巴，第三場係普巴配搭輪換上陣嘅卡巴耶、施素高。可以見到，迪甘斯未揸定主意，正選中場其實係邊三個。因為頭場賽事，三人中場線分工唔太清晰，干堤負責掃蕩，馬度迪同普巴都係全能中場，但位置重疊，令到兩人都發揮唔到最佳水準，就好似以前英格蘭嘅「雙特」咁樣。
喺兩場半有份踢嘅比賽當中，普巴表現最活躍，創造機會、射門、反搶次數最多嘅，其實係對瑞士嘅上半場，因為防守有施素高、輸送連繫有卡巴耶，前場無皮耶同佢爭造波，球隊以普巴為重心咁踢，佢就踢得虎虎生威，下半場皮耶後備入替後，佢表現即刻轉沉，情況最為明顯。情況就好似呢幾年喺祖雲達斯一樣，有派路在後輸送供應、維達爾扮演中場發電機、馬治斯奧負責邊路入楔，普巴就負責進攻派牌，分工清楚，成為佢職業生涯表現最好嘅一段時期。
事實上，普巴身高腳長、身體質素一流，傳、射俱佳，護球能力好，只是個人技巧始終未係一流（睇佢過人多數係用身位體能而唔係技術就知），進攻派牌未係世界級。只要大家唔好當佢係施丹，而當係施丹隔離果個迪甘斯、甚至係柏天尼隔離果個泰簡拿，個觀感就會 Fit 曬架喇！
