歐洲兩大盃賽之一嘅歐霸盃，正式改名做西維爾盃，由西維爾創下紀錄取得三連霸，而利物浦奪亞之後，將無緣下屆歐洲賽事，同車路士兩隊英超名牌球隊只能雙雙專注於本土賽事。
睇返決賽場波，兩隊其實堅係五五波，由控球率、射門數字、角球數量等數據都係半斤八兩，勝負分野只係最後一腳埋門嘅質素同埋心理質素。始終利物浦班波太嫩，得一個老將高路托尼壓得住場，發揮到一貫水準，其他生牯仔大賽經驗唔夠，落後之下，無謝拉特甚至係軒達臣呢類領袖球員帶返起隊波，就好難追得返上黎。睇返對面，西維爾始終踢大賽經驗豐富啲，心理質素好啲，呢樣每每係大賽嘅關鍵所在。
賽後最多球迷討論嘅係西維爾球員幾次手球無事，以及連名宿加歷查都鬧嘅摩蘭奴。手球無判，只能夠歸咎於球證呢個不可抗力，始終球證點判、邊個球證吹場波，都係由歐洲足協決定，球隊無話語權，而摩蘭奴嘅「問題」都唔係今日先出現，攻強守弱係佢特色，季中唔增兵補強只能夠怪自己計劃不足，造成今日輸波嘅結果。
雖然利物浦輸波，下季無歐洲賽踢，但連奪聯賽盃、歐霸盃亞軍，高普嘅成績，球迷應該收貨啦。何況球迷們都應該感覺到，自從高普執教之後，球隊氣氛唔同曬，由羅渣士執教晚期嘅死氣沉沉，變得樂觀積極，起碼相信球隊有能力奪冠，唔再係陪跑份子，或者只係未拎過英超嘅「傳統勁旅」。始終，足球唔單止睇球員質素，唔信就睇下今季季初嘅車路士，仲要講球隊嘅士氣同精神，呢樣就係高普執教之後最明顯進步嘅地方，所以即使手上牌面唔夠靚，都可以有今日嘅成績。
有信念，先可能成為冠軍；無信念，就好難成功。只要喺夏天，球隊引入一啲經驗較豐富嘅中後場球員，當然最好換埋神經刀嘅龍門米盧列，加上前場史杜歷治、法明奴、古天奴如果無傷無病，攻力有一定保證，中後場防守增到兵，等球隊經驗同活力並重，攻守更加平衡，咁樣利物浦就有力成為爭標份子架喇！利物浦奪標起碼要等多一兩季，但相信球迷都願意信任高普，俾多啲時間佢去證明自己嘅。
