經過左周二凌晨嘅賽事，車路士 2:2 迫和熱刺之後，李斯特城提前兩輪於英超封王，正式成為第 6 支奪得英超嘅球會。李斯特城今季表現只可以話係「神奇、頂級、超卓」，「用蔗渣嘅價錢，踢出燒鵝嘅味道」，實在係可喜可賀！
好似雲尼亞里話齋，李斯特城嘅奇蹟唔可以複製，要喺今時今日嘅足球壇，靠士氣、鬥心、整體戰打破豪門壟斷真係好難。李斯特城好難唔令人諗起足足廿年前有多嘅布力般流浪，果陣時香港都仲係英國殖民地。
當時由道格利殊領軍嘅布力般流浪，前線有舒利亞同瑟頓，就好似李斯特城今季有華迪同馬列斯咁，大發神威，帶領球隊登上頂峰。當時嘅球季係點，筆者只係掹車邊睇過下，就無謂「無料扮四條」喇，睇數據之後扮專家唔係我杯茶。
不過，布力般之後嘅遭遇就好清楚——星散，幾年間將陣中主力頻頻賣走，連大熟大勇嘅當家射手舒利亞都賣左去紐卡素，成為紐卡素華麗足球風格嘅一員，瑟頓、舒活、拿索斯一個一個咁走左，布力般流浪就成功換血，將一支爭標份子變成中游，然後是降班。
李斯特城會唔會過多幾年之後，好似布力般流浪咁載浮載沉？呢樣真係要睇管理層嘅造化喇！下季最理想嘅部署，李斯特城應該繼續以聯賽成績行先，始終而家班主力年紀偏大，咁嘅踢法一周雙賽好難捱到季尾，爭取留喺前七以至前四，成為歐洲賽常客，穩定擴大球會收入，同時補充兵源，慢慢安排接班，咁先係長遠之計啊！
李斯特城過左一個夢幻般嘅球季，其實除左李斯特城創歷史奪冠，令人諗起布力般流浪之外，熱刺周二同日嘅表現都一樣令人諗起布力般流浪。當然，熱刺係令人諗起後期「暴力般」嘅風範，要人唔要波、腳腳七注踢人腳，成功創下英超單場最多九面黃牌嘅紀錄，加上插眼、踩人無所不用其極，到最後連人地個教練都唔放過，再等英超賽會處罰，應該起碼多幾個主力陪阿里一齊睇波，一樂也。唔想咁樣，可以點樣？睇下普捷天奴、丹比利、丹尼路斯、林美拉會唔會搵日出黎一齊道個歉，咁可能唔會俾人鬧咁耐掛？
