賽季黎到最後階段，比賽睇一場就少一場，英超焦點除左係李斯特城之外，榜尾形勢都一樣咁緊湊。除咗今季俾人戲稱為「亞視東維拉」嘅維拉早早棄權、篤定降班之外，另外兩個降班席位就咬得好緊，主要由東北雙雄嘅紐卡素、新特蘭同諾域治爭持，而水晶宮同史雲斯都未上曬岸，邊隊來季要英冠再見，真係要鬥到最後一輪至知。邊隊要護級成功，就要睇幾樣野︰一、陣容；二、對手；三、士氣。三者缺一不可。
講陣容，紐卡素無疑係人腳最好果隊，韋拿杜姆、柏比施施斯、艾約斯、施素高、迪奧提，呢班人腳喺英超理論上都係中型班之選，係差在後防史提芬泰萊同高路仙尼今季狀態跌得太犀利，加上季尾出現嘅龍門荒，先至稍稍削弱陣容嘅完整性。新特蘭人腳麻麻，呢幾季嘅主要問題都係入球能力低，難以撕破對手防線，好難贏波，史提芬泰萊離隊之後，入球重責就落到老將嘅迪科爾身上，佢今季入咗 13 球，成為入球隊首席射手，但單天保至尊就比較難，次席射手已經係入4球嘅波連尼，你話幾難入到人地波丫？至於諾域治，算係三隊之中星味最弱嘅一隊，球隊實力平均（咁弱），睇牌面最難睇好。
講對手，諾域治亦係最難踢嘅一隊，剛輸畀前四嘅阿仙奴，之後仲要對曼聯，認真幾難搶分，之後兩場就對住無慾無求嘅愛華頓同屈福特，如果對住兩支強隊唔駛大敗，分數上又未俾人拉開，咁都仲有一線生機嘅。新特蘭嘅對手就比較易哽，多數對手都踢緊風流波，前線生性嘅話，都可以搶到唔少分數。而紐卡素贏到水晶宮，拉埋對手落水，加上之後對住已經降班嘅維拉，最後一輪對可能已經奪冠無望嘅熱刺，有機會連連搶分，成功護級。
講士氣，三隊其實差不多，黎到季尾都唔多谷得起，好似諾域治主場 0-3 輸俾新特蘭，早幾場紐卡素試過 3-2 輸俾諾域治，新特蘭又咬唔入紐卡素，只能夠1-1打成平手。幾場護級大戰踢完之後，無話邊隊特別著數（如果唔係，可能一早上咗岸啦），先搞到今時今日咁嘅膠著局面。
好喇，長篇大論完，究竟邊隊要降班？除咗諾域治凍過水之外，士氣極頹、分心足總盃嘅水晶宮如果贏唔到史篤城，應該有機會「奇蹟」降班。點解成篇文無咩提過水晶宮，又爆冷估水晶宮降班？呢啲咪叫 think out of box 囉！
