上周末，李斯特城主場對韋斯咸，場波未開波，李斯特城已經知道惡啃，開左波仲發現人地踢多幾個，華迪俾球證摩斯話插水，兩黃一紅趕出場，之後仲話韋斯摩根禁區拉衫，俾個十二碼韋斯咸。好嘞，到韋斯咸領先 2:1 嘞，侯夫禁區俾人攬到實一實，摩斯又特事特辦、由班球員自己搞掂，最後完場前卡路爾一個較為硬朗嘅碰撞，摩斯又覺得應該係一個十二碼，咁去到最後，又到比歷覺得唔公平嘞！摩斯成場波搶盡風頭，最後由警衛護送離場。
李斯特城今季氣勢如虹，最後會唔會俾呢場打窒道氣，俾熱刺後來居上？呢樣就唔知，不過呢場之後，好多球迷就為李斯特城呼冤，話球證黑哨。Come on James！唔好下下輸波就賴黑哨，英超球證有邊個唔係猛料先？由卡頓保、普爾、美臣，到馬連拿、奧利華，摩斯算啲咩？好嘞好嘞，就當球證唔公平，但唔公平簡單按嚴重性分都有幾個層次！
第一層，漏判。漏判即係睇唔到球員某啲動作，走甩啲犯規。呢樣其實好小事，咁球證都係人，唔夠攝影機黎都唔出奇，個別球員嘅動作睇唔到都唔算啲咩。雖然一兩個重要判決，足以影響比賽賽果，但都唔算太大問題。
第二層，誤判。誤判即係睇錯野，無當有，有當無。就好似華迪俾人從後撞一撞，然後跌低，睇動作未必構成十二碼，但後防球員同攻擊球員有接觸，亦難有充分證據話佢插水。球證再度出示黃牌嘅決定，唔係過嚴，而係誤判！
第三層，盲！好多人以為球證盲就等於黑哨？只能講句「少年，你太年輕了！」盲只係好多黑哨球證嘅入門，根本都唔算啲咩。泰美斯女神都遮住對眼，同盲左無咩分別，咪一樣咁審判。如果對兩邊吹罰都有甩漏，錯誤唔係淨係喺一隊身上出現，球證一視同仁，只能夠話佢盲，基本上都未算黑哨。
第四層，偏幫，呢個先算黑哨嘅進化版。偏幫，bias，即係話兩隊球員做同一個動作，一個有事一個無事，而且成場波維持咁嘅情況。呢個嚴重性高啲，係因為唔止係一兩個動作嘅判斷，而係成場波都咁吹，就可以令到一隊波踢來縛手縛腳，另一隊就如魚得水，如果場波無十二碼、紅牌呢啲出現嘅話，傳媒、球迷就無咩興趣理，能黑哨於無形。
第五層，無中生有，呢個係誤判嘅進階版，係黑哨的最高層次。最明顯例子係 2002 年日韓世界盃，南韓球員踢人，變左意大利球員插水，托迪加時兩黃一紅出場；或者係西班牙球員底線斬中入波，球證都可以夾硬話球波出左界。呢啲犯規畫面只出現喺球證腦中，但佢以為現實都係咁，出現思覺失調嘅症狀，隨時按需要、喜好搬龍門，咁先係正宗黑哨。
要精確咁討論球證執法，先要釐清概念，唔好次次都淨係識話黑哨咁膚淺。
