呢幾年網上資訊發達，要睇足球嘅新聞、數據，真係易如反掌啊！好多人睇完數據，就覺得自己係專家，其實數據嘅野，睇完真係得啖笑。好似前排有統計話，般尼茅夫中場舒文係頭25輪英超賽事嘅耐力王，係第一個跑得多過300公里嘅英超球員，係英超嘅耐力王喎！
耐力王？So what？睇返個十大排行榜，般尼茅夫除咗有舒文上榜，仲有Ritchie同埋高士寧，西布朗就有多遜同費查上榜，而愛華頓有巴利同巴克利上榜，屈福特、韋斯咸、新特蘭就各有一個球員上榜。李斯特城、熱刺、阿仙奴、曼城呢四隊而家英超Big Four嘅球員都十大不入，咁證明咗啲咩？咪跑得多，唔代表會贏囉！咁般尼茅夫、西布朗咁多球員上榜，又證明咗啲咩？咪輸得多，跑得仲多囉！
點解咁講？踢過波嘅都答得出，一隊人玩馬騮搶波，邊個跑得最多？咪就係個波囉，之後就到隻馬騮，其他負責食花生睇人跑嘅，咪得閒跑兩步囉，駛鬼跑到氣來氣喘咩？咁樣講完之後，係咪即刻明曬？講到底，咪自己友唔生性，傳兩下就失波，搞到自己要跑多幾步追返個波先得。唔信？可以自己搵下般尼茅夫、西布朗、新特蘭啲比賽睇下。要做英超耐力王，你都要多謝隔離果班豬一樣嘅隊友先得架！
除咗班豬隊友，都唔好唔記得多謝自己喎！點解咁講？踢過波嘅都答得出，一隊人玩馬騮搶波，馬騮點先會搶唔到個波？咪就係馬騮變咗隻豬囉！職業球員我唔敢講，但普通業餘球員波底無咁好，馬騮搶波傳多幾次就會自己交失架啦，除非隻馬騮位置感係零，亂咁跑，人地交失都執唔到嘅啫！所以話呢，呢班英超耐力王又點可以唔多謝自己呢？
Okay！我知我知，做耐力王其實唔係壞事，球員勤力追波，場波先會好睇，追波總好過懶懶行。咁我唯有喺度掌聲鼓勵一下啦，啪啪啪！（但如果大家真係咁鍾意睇啲球員跑，我建議英超賽會搞返個英超耐力馬拉松，睇下邊個球員可以跑到最後笑到最後啦！）
唔講住，我都係返去刨下數據做專家，同埋睇返美斯、C朗果啲入球精華算數喇！
