筆者身為資深車迷，今季有兩大願望：一是車路士唔駛降班；二是雲尼亞里能夠帶領李斯特城奪冠而回。依照目前形勢，李斯特城只要周日能夠通過阿仙奴果關，餘下較可能失分的比賽只有對曼聯、愛華頓、車路士以及巨人殺手韋斯咸，首奪英超機會不低。筆者希望狐狸奪冠，除了其今季悅目表現令人信服外，更因為對雲尼亞里的情感因素。
筆者對雲尼亞里的認識自然源於其 2000-2004 年度執教車路士時的表現，為車路士打下根基、成為英超爭標份子，惟當年未能奪冠，成為油王入主後首個被炒教練，已是後話。之後幾年，雲尼亞里轉戰意甲、法甲、希臘，總係予人鬱鬱不得志之感，始終未能拎到重要錦標。其實，筆者一直認為雲尼亞里同柏歷堅尼都屬於建設型領隊，擅長建立球隊、尋找實用班底，當年教車路士、華倫西亞就係最好例子，但佢臨場調動遜於摩連奴、創見不及哥迪奧拿、睇餸食飯唔夠安察洛提，所以同以上名帥相比，總係爭一截。今季佢教李斯特城，球隊嘅戰略調整比以前更好，最明顯係季中防守開始改善，少左季初的熱血反勝，換到嘅係穩定，而且球隊戰術成熟，值得拎冠軍。
睇返最近幾場波就會發現，李斯特城的戰術其實好簡單，甚至可能簡單到好似街場咁，一字記之曰快。快嘅意思係指，以實際為先，不追求控球率，以空間換取時間。由前線開始，岡崎慎司、華迪快追緊迫，將對方造波空間盡量壓縮；中場由真禾特及 Kante 負責搶截，然後分邊或遠射；後防侯夫同韋斯摩根打簡單足球，有波就清，或者即時大腳向前，減少後防壓力，而再由前線開始壓迫，周而復始。比起近年歐洲足球戰術強調的控球在腳、無波走位，李斯特城的足球戰術只是最簡單的快速壓迫，由前線至後防貫徹始終，睇佢對曼城果場，搶斷次數最多的是 8 次嘅富治斯同 7 次嘅Kante，就知李斯特城壓搶幾咁有效；而控球率即使係今季最低嘅 31%，都足夠喺呢場榜首大戰中贏波而回。
李斯特城首循環曾經2:5大敗俾阿仙奴，之後踢法開始轉趨穩健，今個星期能否復仇成功，就要睇雲加能唔能夠抵擋控球嘅誘惑，同李斯特城以快打快喇！
