圖片來源：路透社
高普上年10月執掌利物浦，幾多利物浦球迷忍唔住 J 咗一輪，好似已經初嚐英超冠軍滋味咁，點知黎到而家呢一刻，仲排緊第 8，俾人話同羅渣士差唔多，仲有幾多球迷依然覺得高普勁呢？
起碼有我！
第一勁，係入波多。唔信可以睇返啲成績，高普執掌之後，利物浦試過英超 4:1 贏曼城、6:1 炒修咸頓、3:3 和阿仙奴、5:4 贏諾域治、聯賽盃 6:5 贏史篤城（係互射十二碼贏 6:5，互射十二碼而家唔係入波啊？）。教左四個月，咁多場大手交易，仲唔係好波？唔通好似曼聯咁成日 0:0 就好波咩？（題外話，我其實覺得 2002 年澳洲 31:0 贏薩摩亞果場高水平過巴塞炒皇馬）
第二勁，耐性勁。高普季中走馬上任，揸住一隊唔係自己砌嘅波，去到冬季轉會窗仲忍得住手唔大肆擴軍，堅持薩克達個泰斯拿唔值 5,000 萬就情願唔買唔做水魚，呢樣野其實都好難做到！唔信？可以放長雙眼睇下今年夏天哥迪奧拿黎到曼城，會用幾多錢砌過呢隊每個位置都有兩個球員輪換嘅豪門啦！高普覺得盧卡斯利華、洛夫雲、米盧列仲可以擔正，同而家啲領隊兩場唔夠就話要買人差好遠啦！
第三勁，激情勁。睇返而家英超，自從摩連奴走咗之後，無咗佢喺場邊指手劃腳、亂鬧球證，數數下啲英超領隊，唔係好似柏歷堅尼咁，冷靜到俾老細落曬面都當無事發生、就係雲高爾俾曼聯炒左五六次都仲寫緊筆記、或者好似教授咁掟掟下水樽又掟返落去第四。個個都無黎性格咁，一個字，悶。好彩有高普黎英超，聯賽輸波都可以搞到好似歐聯決賽輸波咁繞場一周多謝球迷，又得閒無事衝下落場、出兩招升龍拳，真係人都精神啲啊！
第四勁，足球理念勁。高普就好似《一代宗師》裡面個宮寶森，揸住嚿餅叫偉仔比想法咁。利物浦呢幾個月踢成咁，啲人仲記得高普主張全場緊迫、小組入滲、無球走位嘅理念，就足以證明高普嘅足球理念幾勁、幾咁深入民心啦！你睇下，李斯特城而家穩佔榜首，周中2:0贏咗利物浦，都無人討論佢嘅戰術，無人會話李斯特城全場緊迫勁、踢法以簡御繁，無人讚雲尼亞里戰術好，一比之下，就知高普幾咁犀利啦！
講堅，堅過馮堅成，我真係希望高普繼續教利物浦，起碼場內場外都娛樂性十足。至於贏唔贏到英超？高普上任時話四季奪冠嘛，何況呢啲留返俾利記球迷諗啦！
