上星期寫完雙紅會，有讀者以為筆者係曼迷，但其實筆者根正苗藍，車迷一名，今周自然要講一講倫敦打吡，所以在此首先利申一下。
車路士再勝阿仙奴，比賽轉捩點盲嘅都知係梅迪薩卡 18 分鐘領紅，5 分鐘之後哥斯達入埋波，場波一半入左雪櫃，之後車路士睇住食，阿仙奴無法扳平，悶住完場。
係咪一張紅牌就解釋到成場嘅賽果呢？未必。雲加 21 分鐘以基比爾入替基奧特，呢個調動就令唔少廠迷訝異，鏡頭更捕捉到有幾個廠迷 O晒嘴，證明大家都唔知雲加諗咩。雲加呢個換人其實反映佢信心唔夠，今季順風順水，有機會爭冠，主場出撃，對住今季態沉嘅車路士，即使踢少一個都未必會輸，偏偏換走基奧特，擺到明想以祖爾金寶、禾確特、奧斯爾打無鋒、穩守突擊，以速度牽制車路士，結果換完人無耐就失波，雲加嘅如意算盤即刻打唔響，而且少咗基奧特同梅迪薩卡，少埋高波呢瓣，車路士防線縮後同你打陣地戰，咁阿仙奴就無晒符。好衰唔衰，睇返阿仙奴後備席，同祖爾金寶、禾確特類型相似嘅就有張伯倫同剛傷癒嘅山齊士，但係同基奧特相似嘅就一個都無，所以換完人之後，基本上變唔到陣，進攻模式單一，更加難追平。
最正路，雲加其實係換祖爾金寶、禾確特其中一個，靠基奧特做進攻第一點，再配合其他球員後上支援，或者冒險抽走藍斯或法明尼，維持前線火力同車路士搏過。喺落後之下，奧斯爾變左打最前，祖爾金寶、禾確特後上插入，但車路士防線收後，空間壓縮，好難單靠速度撕破防線，再加上人少打人多，阿仙奴好難攻得入。上半場最有威脅嗰腳係前線球員引開守衛，防中法明尼插入小禁區射高嗰腳，如果換轉第二個攻擊球員射，應該已經扳平，但其他攻擊球員都俾人凍結晒，好難有單對單射波嘅機會。下半場，換入山齊士之後，靠佢嘅個人突破能力，確實為車路士製造不少麻煩，但獨力難支，禾確特、奧斯爾已經速率下降，無人配合，經常面對車路士兩至三名防守球員，難度不少。
呢場比賽之後，雲加要諗下，係咪要趁轉會窗完結之前，快快手補充一個正中鋒，等基奧特傷病或者自己換錯人後，都仲可以補救，有繼續變招嘅能力，一鼓作氣破埋聯賽錦標荒，始終今季係近年難得咁順，要贏就贏盡佢喇！
