第一次喺呢度寫專欄，其實都唔知寫咩好，不過好在編輯大人俾在下 freestyle 咁寫乜嘢都得，又可以用廣東話寫，粗口除外。大家可以當呢個專欄入面寫嘅嘢同在下嘅Facebook page 「不負責任金融研究中心」入面嘅內容互相 compliment，所以除咗呢個專欄之外，各位讀者應該要定期留意吓敝 page，最低限度都俾在下呃下 like 啦。
15 號禮拜五凌晨一點執緊筆寫呢篇文嘅時候，S&P 跌緊 48 點，恆指夜期收市報 19,118。美國嗰邊期結，WTI 跌穿 30 蚊一筒（29 個幾），除咗 VIX 升到 hi hi 之外個美市基本上跌到仆街。如果有讀開在下嘅 Facebook page 嘅話，在下由舊年 3 月開 page 以嚟就一直係咁強調當美國加息，EM 必死。係呀，在下講嘅 EM 係包括大陸（同香港）。
在下元旦日喺 Facebook page 寫嘅 outlook 亦有寫到幾點：未來幾年必炒 macro-trend，油價必繼續仆街，同埋 currencies 今年應該好有 trend，特別係人民幣。不過，在下篇 outlook 好似無乜點樣寫過股市，一來在下舊年好少玩股票（在下舊年已經開始炒緊 macro-trend），二來在下又唔係 sell-side 人，唔係好喜歡測股市高低目標幾多點呢啲傻豬野，反正在下唔做成條街大把人做啦係咪？不過又咁，歷史俾世人嘅教訓係——升市中必然強者先升，跌市中必然弱者先死。而同 DM 嗰幾個主要大股市比（即係講緊歐美），EM 呢啲弱者一定會死先，而且經過咗 08 年 GFC 同 QE 後，好多 EM 其實已經好 stretched，所以當美國一加息，弱過藥煲嗰堆應聲倒下，and YES that includes China。
美國同歐洲今年仲會唔會 rally？好老實咁同大家講，唔洗在下喺呢度講，齋睇圖嘅話都應該知道歐美已經因為聯儲局開始加息週期而見頂，起碼在下唔係好見到今年上半年有咩好嘢可以令歐美股市升返上去（S&P進入咗技術熊市），除非聯儲局又學人行咁嚟個政策 U-turn 再開 QE 啦。不過大家要留意喎，就算 FOMC 真係轉呔重開QE，喺而家呢個市嘅 bearish mindset 之下，more of the same仲可唔可以餵得飽個市場？真係好難講。
當然，在下知道大家最關心嘅一定係香港。香港就真係慘啲，當年背靠大陸同弱美元令到資產價格（即係樓價）升到 hi hi 聲，而家呢個 double whammy 就會夾死香港（在下統稱呢個為 reverse QE effect）樓市。股市最無辜，QE 無得升，但係加息跌到仆街就有份。
其實在下最擔心嘅唔係香港股市，而係個港匯。寫緊呢篇嘢嘅時候，港匯做緊 7.798，報紙話你聽有人擔心呢個係港匯走資嘅先兆，在下唔敢咁快下定論，因為以往農曆新年前港匯必弱，跨國公司（特別係大陸嗰啲）需要班資回朝，所以究竟港匯跌只係因為 CNY effect 定係呢個新世界之下嘅其中一個新現象其實仲有待觀察。如果新年後呢個現象持續落去嘅話，大家再驚都唔遲。不過，可以肯肯定嘅話，油價跌到仆街，其實好多 oil exporting countries會將佢地咁多年嚟賺落嘅 petrodollars 攞返出嚟用，而以往呢啲 petrodollars 一係就以 SWF 形式投資，一係就俾基金去管理。舊年下半年 Financial Times 已經有報道話沙特係咁 redeem 之前擺喺基金經理度啲 petrodollars 返屋企用，而近呢十年八年唔少基金係咁掉錢去 EM 市場（仲記唔記得金磚四國呀靈貓六國嗰啲國家？），所以呢啲錢一走佬嘅話其實股市一定係會遭殃。呢個就係 EM 必死嘅其中一個 manifestation。
寫到而家，S&P 跌緊 54 點（最多跌過 62 點），如果今晚唔反彈嘅話下個禮拜一都幾危吓。
唔知大陸會唔會又嚟個雙降呢？禮拜一前應該有答案。
